أنظمة الحواسيب وعلاقتها بالشبكات الخفية
السلام عليكم شعب :: DARK WEB ARAB
حصريا...لأحسن مجموعة فالمغرب و افريقيا و العالم العربي...لأحسن ناس...أعضاء DARKWEB ARAB الكرام و الكريمات...شرح مبسط لكيفية عمل أنظمة الحواسيب الكمية....و ما علاقتها بالشبكات الخفية....
الحواسيب الكمية...ثورة الذكاء الاصطناعي...
باش نفهمو شنو هي الحواسيب الكمية..خاصنا نعرفو ان كل الحواسيب و الاجهزة الالكترونية لي كاينة فالعالم دابا خدامة بنظام "صفر" او "واحد" يعني جوج احتمالات إما 0 أو 1........اما الحواسيب الكمية فهي تعتمد على نظام "صفر" او "واحد" أو "ما بينهما"... هاد "ما بينهما" غادي تعطينا بزاف ديال الإحتمالات مشتركين مابين واحد و صفر ...هاد الاحتمالات المشتركين مانقدروش نحسبوهم بعقلنا و صعب جدا نحسبوهم بحاسوب عادي...هنا فين جات الفيزياء الكمية و عطاتنا ما يسمى بالحواسيب الكمية التي تعتبر ثورة في عالم الذكاء الاصطناعي...بحيث انه اصبح بإمكان الحواسيب الكمية معالجة عمليات حسابية معقدة في وقت قصير و بسرعة خارقة و في خطوة واحدة...في حين إيلا بغينا نحلو هاد العمليات الحسابية فحاسوب عادي غادي يخاصنا وقت طويل و خطوات كثيرة......
هادشي كامل سبابو الفيزياء الكمية و ميكانيكا الكم لي رفضها انشتاين و ستيفن هوكينغ(انشتاين قاليهم الله لا يلعب النرد يعني الله ماكيقمرش...كيقصد بيها أن ميكانيكا الكم تعتمد على الإحتمالات)...و لكن ابتداء من الثمانينات غادي تنجح الفيزياء الكمية و ميكانيكا الكم نجاح خارق ف حل و تفسير مجموعة من المشاكل العلمية متعلقة بالذرات و الجزيئات.... و كذلك عطاتنا مايسمى بالحواسيب الكمية...
باش نعرفو القدرات ديال هاد الحواسيب الكمية نعطيكم مثال....مثلا عندنا هاكر طاح على بيانات مهمة من موقع مهم ...و لكن دوك البيانات ماقدرش يفتحهم لأنهم مشفرين تشفير قوي...نفترض عندو برامج واعرة ديال فك التشفير...إيلا بغا يفتح دوك البيانات غادي يخصو جمبع البرامج يبقاو خدامين ف حواسيب كثيرة مدة طويلة تقدر تفوت مئات او الاف السنين و هو كيجرب فالاحتمالات حتى يطيح ف الإحتمال الصحيح...و لكن مع الحواسيب الكمية يمكن ليه يفك التشفير فخطوة واحدة فوقت قصير لأن هاد الحواسيب عندها الإمكانية باش تحلل جميع الإحتمالات بطريقة عجيبة كتعتامد على تحليل الموجات و الجزيئات...هاد العملية وصفوها العلماء بأنها بحال السحر شي حاجة مايتصورهاش لعقل...
و ايضا هاد الحواسيب الكمية قادرة على كشف و اختراق جميع انواع اجهزة الاتصال و الشبكات لي كاينة دابا فالعالم المعلنة و المخفية بما فيهم الماريانا اخر طبقة فالانترنت الخفي...و قادرة على كسر أي تشفير بما فيهم أنظمة التشفير العسكرية و المالية لي معروفة و لي ما معروفاش ...
الحاصول الخوت...الدول العظمى كتسابق على هاد التقنية و نايضة الحرب فالخفاء عليها...كندا بدات كتنتج حواسيب كمية و باعتهم لشركات امريكية عملاقة و امريكا عربطت على كندا باش ماتبيعش لاوربا ( قالت ليهم امريكا إيلا بعتوه لاوربا غدا يصبح فدرب غلف ههههه غي ضاحكين)...و امريكا معربطة لأن هاد الحواسيب الكمية يقدرو يستاغلوها اعداءها ف كسر تشفير اقوى انظمة الحماية الامريكية و هادشي لي خلا وكالة الامن القومي الامريكي ف 2015 تعلن فالموقع الرسمي ديالها فالانترنت أن خوارزميات التشفير لي خدامة بيهم امريكا أصبحت غير امنة...الشيء لي شكل صدمة فالعالم...و هادشي بسبب ظهور الحواسيب الكمية....و الان التحدي لي كاين بين الدول العظمى هو شكون لي غادي يصنع لينا اسرع "بروسيسور أو معالج كمي"..و الناس راه خدامين فالبحث العلمي ليل نهار....و هنا فين غادي يجي إدوارد سنودن و غادي يكشف وثائق سرية امريكية كتقول بأن امريكا مازال واحلة فهاد التقنية الجديدة و متأخرة فيها بزاف بالمقارنة مع شي دول بحال كندا...
كندا مشات بعييييييد فهاد الموضوع ديال الحواسيب الكمية بحيث انها فتحات موقع فالانترنت متصل مباشرة بحاسوب كمي...فتحاتو للمطورين و الباحثين و الشركات و الدول باش لي عندو شي فكرة و بغا يخدم عليها مرحبا بيه عند كندا....و حتى الادوات و البرامج باش أي واحد فالعالم بغا يصايب شي تطبيق حطاتهم ف موقع GitHub مجانا و لغة البرمجة المستخدمة هي لغة Python اسهل لغة برمجة ممكن يتعلمها الإنسان... هاد لموقع مفتوح فوجه الجميع و كاين حساب مجاني و حساب مدفوع...و لكن كيقبلو الامريكيين و الكنديين...ويلا كنتي من الدول الاخرى كيقولك راسلهم فالايمايل .... هاد لفيلم كامل لي دايرا كندا ديراه لسبب واحد...و هو انهم عندهم حتى هوما ازمة فالافكار و الإبداع و مازال مالقاو الحل لشي مشاكل معقدة و باقي ما فهموش مزيان بيئة عمل نظام الحواسيب الكمية و بغاو يستافدو من المطورين و المصممين اقصى استفادة باش يفهمو كثر كيفاش يبرمجو هاد الحواسيب الكمية و فاش ممكن يستاغلوه إيجابيا (لأنه سلبيا يقدرو يديرو بيه العجب..).....و لحد الان يالاه تمكنو باش يصاوبو 100 تطبيق او برنامج فعدة مجالات مثل الطب و الفضاء و الفنادق و تطبيق خاص بالتنبؤ بالزلازل و التسونامي....الخ...و هادشي صاوبوه ناس من مختلف انحاء العالم كاليابان و هولندا.... و شركات كبيرة مثل الناسا و غوغل حتى هوما داخلين يستافدو...
إيلا شي واحد تقيد معاهم فالموقع و قبلوه غادي يولي من حقو 1 دقيقة فالشهر باش يتيستي (test) الكودات البرمجية و البيانات مباشرة فالحاسوب الكمي و الحاسوب هنا كيعطيه الحل او الحلول الممكنة فرمشة عين ...بلا ما تضحك ولا تستغرب...لأنك كتعامل مع حاسوب كمي...عملية test واحدة تستغرق مابين 15 و 250 ميلي ثانية يعني فهاديك الدقيقة تقدر دير 4000 عملية تيست.فالشهر ..لانك كل شهر كيعطوك دقيقة ويلا بغيتي كثر كتشري حساب مدفوع Premuim .....غير هو خاص بنادم يكون طيارة ف الفيزيك و البرمجة و الانجليزية فنفس الوقت لأنهم هوما يالاه واصلين ل مرحلة محاولة فهم بيئة عمل أنظمة الحوسبة الكمية...و لكن واخا هكاك كاين تقدم كبير فالابحاث...
موقع الشركة الكندية على الانترنت لمزيد من المعلومات
https://www.dwavesys.com/
حاولت ان أنبسط و ابسط الموضوع قدر الإمكان لأن الموضوع عنده علاقة بالفيزياء و علم الحوسبة....
ليست هناك تعليقات